चिल्ली येथील शेतकरी पुत्राची जिद्द ठरली यशस्वी – सांगलीत पोलीस दलात ओंकार मुरमुरे यांची निवड
चिल्ली येथील शेतकरी पुत्राची जिद्द ठरली यशस्वी – सांगलीत पोलीस दलात ओंकार मुरमुरे यांची निवड
यवतमाळ :-
महागाव तालुक्यातील चिल्ली ईजारा गावातील शेतकरी कुटुंबातील ओंकार सुखदेव मुरमुरे यांनी अत्यंत प्रतिकूल परिस्थितीवर मात करत पोलीस दलात यश संपादन केल्याची माहिती आहे.
सांगली येथे झालेल्या पोलीस भरती प्रक्रियेत त्यांची निवड झाली असून, त्यांच्या या यशामुळे संपूर्ण गावात आनंदाचे वातावरण निर्माण झाले आहे.
ओंकार यांचे कुटुंब शेतीवर अवलंबून असून, आर्थिक अडचणींमुळे शिक्षण आणि स्पर्धा परीक्षेची तयारी करणे त्यांच्यासाठी मोठे आव्हान होते. मात्र, परिस्थितीसमोर हार न मानता त्यांनी कठोर परिश्रम, सातत्य आणि जिद्दीच्या जोरावर आपले स्वप्न साकार केले. अभ्यासासोबतच त्यांनी शारीरिक तयारीवरही विशेष भर दिला, ज्यामुळे त्यांना या भरती प्रक्रियेत यश मिळवता आले.
ओंकार यांच्या यशामुळे गावातील तरुणांना प्रेरणा मिळाली असून, “कष्ट आणि जिद्द असेल तर कोणतेही ध्येय गाठता येते” हा संदेश त्यांनी आपल्या कृतीतून दिला आहे. त्यांच्या या यशाबद्दल गावकऱ्यांकडून आणि परिसरातील नागरिकांकडून त्यांचे कौतुक होत आहे.
ओंकार मुरमुरे यांचे यश हे केवळ त्यांच्या कुटुंबासाठीच नव्हे, तर संपूर्ण चिल्ली ईजारा गावासाठी अभिमानाची बाब ठरली आहे.