शिरूर तालुक्यात बंजारा समाजाचा ऐतिहासिक मोर्चा; आरक्षणासाठी लाखोंचा लढा पेटला!

शिरूर तालुक्यात बंजारा समाजाचा ऐतिहासिक मोर्चा; आरक्षणासाठी लाखोंचा लढा पेटला!

ब्युरो रिपोर्ट पुणे :

न्याय्य हक्कासाठी झगडणाऱ्या बंजारा समाजाच्या हाका आता अधिक तीव्र झाल्या आहेत. हैदराबाद राज्याच्या काळातील शासन निर्णयानुसार अनुसूचित जमाती (एस.टी.) प्रवर्गामध्ये आरक्षण मिळावे, या प्रमुख मागणीसाठी सकल बंजारा समाजाच्या वतीने शिरूर तहसील कार्यालयावर भव्य मोर्चा काढण्यात येणार आहे.

हा मोर्चा ऐतिहासिक ठरणार असून, समाजबांधवांनी लाखोंच्या संख्येने उपस्थित राहून आपली ताकद दाखवण्याचे ठरवले आहे. समाजातील तरुण, महिला, ज्येष्ठ नागरिक, शेतकरी, विद्यार्थी, सर्वच घटक या आंदोलनात खांद्याला खांदा लावून उभे राहणार आहेत.

आरक्षण कृती समिती व नायक, कारभारी यांनी सांगितले की, “हैदराबादखालील काळात बंजारा समाजाला अनुसूचित जमातीचा दर्जा मान्य होता. मात्र, महाराष्ट्र स्थापनेनंतर झालेल्या अन्यायामुळे समाजाला एस.टी. प्रवर्गातून वगळण्यात आले. या अन्यायग्रस्त समाजाला न्याय मिळावा, हाच आमचा लढा आहे. यावेळी लाखोंच्या संख्येने समाजबांधवांनी शिरूर तहसीलवर मोर्चा काढून आपली ताकद दाखवावी.”

मोर्चाच्या आयोजनासाठी शिरूर तालुक्यातील सर्व गावांमध्ये मोठ्या प्रमाणावर सभा, बैठका, प्रचार सुरू आहे. ढोल-ताशांचा गजर, पारंपरिक पोशाख आणि संघटित शिस्तीने समाजातील तरुणाई या मोर्चासाठी सज्ज झाली आहे. “आरक्षण आमचा जन्मसिद्ध हक्क आहे”, “एस.टी. प्रवर्ग आमचा अधिकार आहे” अशा घोषणांनी शिरूर शहर दणाणून सोडण्याची तयारी झाली आहे.

समाजातील कार्यकर्त्यानी स्पष्ट केले आहे की, सरकारने या मागणीवर तातडीने सकारात्मक निर्णय घेतला नाही, तर पुढील काळात राज्यभर आंदोलन अधिक तीव्र करण्यात येईल. तहसील कार्यालयावर धडक देऊन निवेदन सादर करताना समाजाच्या न्याय्य मागण्यांकडे प्रशासनाने गांभीर्याने पाहावे, अशी चेतावणीही दिली गेली आहे.

बंजारा समाजाचे विद्यार्थी उच्च शिक्षणात मागे पडत आहेत, तरुणांना नोकऱ्यांमध्ये आरक्षणाचा लाभ मिळत नाही, त्यामुळे बेरोजगारी वाढली आहे. शेतकरी संकटात असून, महिला व मुली वंचित राहतात. या सर्व समस्यांचे एकमेव समाधान म्हणजे समाजाला एस.टी. प्रवर्गात समाविष्ट करणे, असा ठाम पवित्रा नेत्यांनी घेतला आहे.

मोर्चामध्ये विशेषतः महिलांची उपस्थिती लक्षणीय राहणार असून महिला समाजाचे नेतृत्व करणार आहेत.

शिरूर तालुका प्रशासनालाही या मोर्चामुळे मोठ्या प्रमाणावर सुरक्षा व्यवस्था तैनात ठेवावी लागणार आहे. पोलिस यंत्रणाही सतर्क असून, संपूर्ण तालुका मोर्चाच्या पार्श्वभूमीवर धगधगत आहे.

दरम्यान, सकल बंजारा समाजाने पुन्हा एकदा स्पष्ट केले आहे की, हा लढा केवळ आरक्षणासाठीच नव्हे तर सन्मानासाठी आहे. “आम्हाला आमचा न्याय द्या, अन्यथा लढ्याची ज्वाला संपूर्ण महाराष्ट्रभर पेटवली जाईल,” असा इशारा देत हा मोर्चा आता ऐतिहासिक होण्याच्या मार्गावर आहे.

तात्काळ एस टि प्रवर्गा मध्ये आरक्षण मिळावे अशा आशयाचे निवेदन रांजणगाव पोलीस स्टेशन ता. शिरूर जिल्हा पुणे येथे देण्यात आले आहे ह्यावेळी कारेगाव नगरीचे (नायक) देविदास भाऊ पवार

व तसेच कारेगाव नगरीचे ( कारभारी ) निलेश भाऊ जाधव गोर सेना तालुका उपाध्यक्ष अनिल भाऊ जाधव,जगदीश चव्हाण,मेनकाताई राठोड,रितेश राठोड, अनिल पवार,गजानन भाऊ सोनार, इतर समाज बांधव उपस्थित होते .

एसटी आरक्षण एल्गार मोर्चा येणाऱ्या दिनांक 29/09/2025 सोमवारला शिरूर तहसील येथे मोठया संख्येने मोर्चा काढण्यात येणार असल्याचे निवेदनात म्हटले आहे.

तमाम बंजारा बांधवांनी मोठ्या संख्येने मोर्चामध्ये सहभागी होण्याचे आवाहन एस टि आरक्षण कृती समिती कारेगाव ता. शिरूर यांच्या वतीने करण्यात आले.